ابيات نميم جديده ل امير النميم احمد خالد
كيف الشوره إذا طرف الكفن لفانا.
ويوم تتحلل الجته الأهِه تتفانا.
قبور تنضح عبير وقبور تمِت عفانا.
كفانا معاصي فالدنيا الغروره كفانا.
وكيف الشوره إذا نفخ الملَك فالبوق.
وجابو جهنم الفاتحه فطريقنا البوق.
والكون في يمين ملك الملوك مطبوق.
مشهد رعب في أجواءو ما مسبوق.
وبخت العاش ينفذ في أوامر ربو.
وبخت العفو لسنيهم ولا يوم سبو.
بخت الطلعو عالدين الحنيف واتربو.
وبخت السمعو لمنادي الفريضه ولبو.
وويل الحققت نفسه العنيده مناها.
وكل آمالو عالدنيا الدنيه بناها.
يوم الأم ما يشغلش بالها ضناها.
هل فيه حاجه لي آخرتنا قدمناها.
قدام الملك سبحانه يَخَذِل حالنا.
اتغيرنا واتبدلنا إيه الجالنا.
يوم نتجاب وتتجاب في صحف أعمالنا.
حجه ننجي بيها النفس وين نلقالنا.
بالإسلام نزيل كل الشكوك الجوه.
وبالإسلام تصير بعد العداوة أخوه.
بالإسلام نسوي ونعمل الما اتسوا.
وبالإسلام نزيد بأس وصلابه وقوه.
بالإسلام نعقل ف الشباب الصاع.
وبالإسلام نعود صاعين نرد الصاع.
بالإسلام نجيب الصاع وسارق الصاع.
وبالإسلام نخلي الكونجرس ينصاع.
عبدك آتي ي البابك ولا بتغلقو.
بأقدامًا فمنحدر المهالك زلقو.
سكاكين الذنوب وصلت مشارف حلقو.
كبش التوبه قبل ما يدبحنو أخلقو.
راكع باكي متندم علي أفعالي..
ومتعشم فكرم المنعم المتعالي.
قبل الموت مافي غفله وضلال يوعالي.
يجمع بيني ما بين توبتي الضايعالي
اسمعي كلمة الياما اتخدع وسمعلك.
فالآخره اللي فالدنيا اتعمل هيزعلك.
قبُل ما انفاسك الطالعات ولا ترجعلك.
قفي يا نفسي وانتبهي لعواقب فعلك.
لا وارث دهب لا فيه فحوزتي أراضي.
وغرض الدنيا ما ضميتو لي أغراضي.
من ما قمت حامد فاهي شاكر راضي.
أعيش مستور واموت مستور كذاكا مرادي.
امير النميم احمد خالد
نقب نغطس نقوم نوقع نجيب التاهن.
وراس الخلفو توَّهِّن نجيبو وراهن.
نوتق سامر الخيط البينتجو واهن.
عشان خاطر عيون شوفتنا كل مناهن.
موافق لو ف راحتكم هعاني اعاني
وآجيكم ولو كل الظروف مانعاني.
أشغل مكنة العقل البيضخ معاني
واطيب خاطر الناس الهنا متابعاني
الفقر ان دخل بيت ما بتخشو النمله.
بياجي وتاجي تابعيه الديون بالجمله.
عاصف جوو غير ممطر معباي رمله.
وصاحبو بيبقي أوسخ من عساكر الحمله.
الفقر الدكر فوق السبايت قاقا.
ونزل العشه وبقينا فثواني شقاقا.
عيبو بيبقي فالليل كالمره النقاقه.
وميزتو بيكشف الناس الصدُر دقاقه.
اسمع كلمة الشاف العجب تحكيش.
بيع الباع يواد بس الرجال تبكيش.
مين قبلك دخل قصه وطلع يشكيش
كل الحبو داقو مرارة الفركيــش.
جميل الحب لا يستوجب الإنكار.
وكام قصه الخجل خلاها فالتذكار.
عينك أفشت السر الورا الأفكار.
عرفتك عاشقه محسوبك ولد ود كار.
جميل الحب شئ يستوجب الإشهار.
أنسخي من لياليا الكئيبه نهار.
عينك محرجاكي مصره ع الإظهار.
وخجلك شايفو قدام الغرام ينهار.
أقول أوصف فبركات الخفيف الدم.
والاقي الحرف طاوعني وخضعلي النم.
فيه الأخ والجار والرفيق والعم.
والما عندو بركات عندو هم وغم.
هزرع في مزارع تونس الآمال.
تخضر فالخليج تطرح يمين وشمال.
تطيب يجنوها من بت المعز عمال.
عشان تتودا للمحتاجها فالصومال.
بوقع برضي في نفس الحوار والغلطه.
وأعشق قلب ما تفوت في قساوتو البلطه.
تجاهلو كان سبب فالإحتقان والجلطه.
وقلبي التاني مغرم بي يدانو ف مالطه..
وين القالي عالقلب المتيم سلطه.
وين القالي لي وجع المشاعر خلطه.
نافد صبري ولا فاضل ف علبتو شلطه
وماشي بنيتي فالدنيا العليّ متسلطه
أقدر فاليقدر وآبا من ياباني.
والرباني علي هذا الأساس رباني.
زول ما جاني يوم كنت أبكي عالجباني.
مالي بيهو إذا دق الفرح بيباني.
أعرف واحد البخل اتنحت فوق صلبو.
وباين حتي في ضعف ونحافة كلبو.
إذا اشتري مستحيل مخلوق ف شروه يغلبو.
يدس رغيفو ويسيبك تعض ف قلبو.
قول ليك نمة سمعني الجديد العندك.
واطلق فوق سراديب البخرِّبو جندك..
قول الحق قولة الحق سنْد تسندك.
وفعين أبو عند قول يابو عند بطل عندك.
كترت فوق حيوط مدن الهوي النطناطه.
كلها شايفه نفسها حررت غرناطه.
مفتقدين نقاش الألسن الفناطه.
وعِدِم ابو دمغه أما الفالصو بالطرناطه.
يالشقلبتي حال وُعَّاظ وناس متشيخه.
الناس كلها فسكة غرامك دايخه.
مشاعرنا ف أواني محبتك متنيخه.
كيوسف إنتي والله وعيونا زليخه.
موكب سيرها بيوضح وقار منبعها.
وحرس مرهونه بالآلاف رهَن إصبعها
الناس إحترام يوقف تلت تربعها.
وتمشي ويمشي قائد المنجباد يتبعها
...........................
تعليقات
إرسال تعليق